चंदाच्या साथीला, चांदणी प्रितीला,
काळोख निघाला, ओलांडूनी.
तांबडे फुटले, नभ झळाळले,
क्षितीजी टेकले, पहाटेला.
हरखली सृष्टी, रवीवरी दृष्टी,
प्रकाशाची वृष्टी, चहूकडे.
थेंब होई मोती, चमकूनी जाती,
हळू विसावती, तृणावरी.
लपूनी पानात, डोलते झोकात,
उमले लाजत, कळी कळी.
वारा वाहे धुंद, घेऊनिया गंध,
आसमंती मंद, दरवळे.
पंख झटकूनी, घरटे सोडूनी,
जाती ते उडूनी, पक्षी सारे.
रांगोळी रंगित, सजली दारात,
उत्साह भरात, मोहरला.
यमुनेच्या तीरी, मंजूळ बासुरी,
वाजवी मुरारी, राधा सखा.
पहाट नटली, सूरात भिजली,
भक्तित भिजली, कृष्णासवे.
कोणत्याही टिप्पण्या नाहीत:
टिप्पणी पोस्ट करा